Weibliche Brust

Die wiibligi Brust (lat. Mamma, Pl. Mammae) ghört anatomisch zu de sekundäre Gschlächtsmerggmol vo dr Frau. D Brust bestoot us Fett- und Bindgwääb und dr Brustdrüese (Glandula mammaria). Die cha bi stillende Fraue as Sekret Muetermilch dur fiini Kanääli abgee, wo uf dr Brustwäärze uusechömme. D Brustdrüese entspricht dr Milchdrüese vo de andere Süüger.

Die biologischi Funkzion isch zerst s Stille vo Buschi mit Muetermilch. Wil aber die mäiste wiiblige Primate im Verheltnis zu iire männlige Artgnosse wääsentlig weniger usbrägti Brüst häi as d Fraue, nimmt mö aa, ass die wiiblige Brüst au no e speziell menschlige Sexualdimorfismus si und iiri Aaziejigschraft uf potenzielli Partner e zwäiti wääsentligi Funkzion usmacht. D Brüst – vor allem d Brustwäärze – ghöre zu de erogene Zone.

In dr Medizin beschäftigt sich d Senologii mit de Chrankhäite vo de wiiblige Brüst. Äini vo de hüfigste isch dr Brustchräbs.